នៅពីមុខខ្ញុំមានប្រុសស្អាតម្នាក់កំពុងអង្គុយអានសៀវភៅ ហើយខ្ញុំកំពុងអានសៀវភៅនៅក្បែរគេដូចគ្នា ។ គេធ្វើហាក់មិនចាប់អារម្មណ៍ថា មានមនុស្សម្នាក់កំពុងតែលួចមើលគេនោះទេ ។ ដៃគេកំពុងសរសេរអ្វីម្យ៉ាង ញាប់ស្អេកឥតដកសោះ ។ ខ្ញុំដៀងមើលក្រដាសនោះបន្ដិចទើបដឹងថាវាជាក្រដាសលំហាត់វេយ្យាករណ៍ភាសាអង់គ្លេស ។ គេបើកទំព័រមួយទៀត ហើយលិតមាត់បន្តិច រួចដាក់ប៊ិចចុះអានសំណេរនោះ រួចក៏បន្តសរសេរគូសវាសនៅលើទំព័រថ្មីនោះសារជាថ្មី ។ ម្តងគេបើកសៀវភៅសរសេររបស់គេសរសេរអ្វីកំណត់ចំណាំអ្វីមួយ រួចត្រលប់ងាករកក្រដាសនោះសារជាថ្មិ ។ មិនមែនភាពសង្ហាររបស់គេនោះទេ ដែលទាក់ទាញកែវភ្នែករបស់ខ្ញុំឲ្យទៅមើលគេនោះ ប៉ុន្ដែគឺគេហាក់ដូចជាអ្នកខំរៀនណាស់ បែបនេះឯងដែលខ្ញុំចូលចិត្ត ។ ខ្ញុំរាងពិបាកក្នុងចិត្តណាស់ ព្រោះអង្គុយក្បែរគ្នាពេកដូច្នេះ ធ្វើឲ្យខ្ញុំពិបាកមើលគេខ្លាំង បើងាកមើលគេពេក ខ្លាចគេសង្ស័យថា ខ្ញុំចាប់អារម្មណ៍គេ ហើយគេម៉ៃថាខ្ញុំជាមនុស្សប្រភេទស្រលាញ់ភេទដូចគ្នា ។
ខ្ញុំចេះតែមានអារម្មណ៍ភ័យខ្លាចថាគេនឹងដឹងថាខ្ញុំកំពុងលួចមើលគេ ។ តែអង្គុយជិតគេបែបនេះ ខ្ញុំមានអារម្មណ៍រំភើបៗបែបនិយាយមិនត្រូវ បែបប្រហែលមកពីខ្ញុំធំក្លិនស្ព្រៃយ៍ក្រអូបបាញ់ខ្លួនរបស់គេនោះហើយមើលទៅ ។ ខ្ញុំចូលចិត្តទឹកបាញ់ខ្លួនប្រភេទដែលមានក្លិនស្រាល ហើយមិនក្រអូបខ្លាំងពេក ហើយចៃដន្យអីគេប្រើប្រាស់ប្រភេទទឹកបាញ់ខ្លួនដែលខ្ញុំចូលចិត្ត ។ គេមូរដៃអាវ តែអត់មានប្រឡេះឡេវទ្រូងអីទេ យ៉ាងណាក៏ដោយ សាច់អាវរបស់គេរាងស្ដើង មើលឃើញរាងអាវក្ងានវៀលក្លៀកនៅខាងក្នុង (សម្រាប់ខ្ញុំបុរសដែលពាក់អាវក្នុងប្រភេទនេះ គួរឲ្យទាក់ទាញណាស់) គេមានទ្រូងទូលាយហាប់ណែនល្អណាស់ ។ ជួនកាលគេងើបទៅរកឯកសារផ្សេងទៀត នៅធ្នើដាក់សៀវភៅ ខ្ញុំលួចមើលដំណើរគេពីក្រោយ យ៉ាងភ្លឹក ។ គេមានរូបរាងសង្ហារណាស់ ដំណើរប្រកបដោយភាពស្វាហាប់ ។ នេះមិនមែនជាលើកទីមួយទេ ដែលខ្ញុំ និងគេអង្គុយក្បែរគ្នាបែបនេះ ។ ខ្ញុំមិនមែនជាអ្នកសិក្សាអីទៀតទេ ព្រោះខ្ញុំមានការងារធ្វើហើយ ទើបតែរៀនចប់ ហើយក៏ទើបតែចាប់ផ្ដើមធ្វើការដែរ ។ គាប់ជួនអីថ្ងៃច័ន្ទ សប្ដាហ៍មុនខ្ញុំអផ្សុក ដោយជិះកាត់បណ្ណាល័យជាតិស្រាប់ផង ខ្ញុំក៏ចូលអានសៀវភៅលេង ហើយក៏បានជួបកម្លោះនេះ ។ ខ្ញុំមកទីនេះថ្ងៃច័ន្ទ និងថ្ងៃសុក្រ ដោយសារកត្តាការងារអនុញ្ញាត្តិឲ្យខ្ញុំទំនេរតែពីរថ្ងៃនេះ ហើយរាល់លើកដែលខ្ញុំមក គឺខ្ញុំតែងបានជួបគេជានិច្ច ។ អរគុណព្រះជាម្ចាស់ដែលតែងតែមានកៅអីទំនេរនៅជាប់គេជានិច្ច ។ ហេតុតែស្រលាញ់អ្នកចូលចិត្តអានសៀវភៅ ធ្វើឲ្យខ្ញុំទៅបណ្ណាល័យយ៉ាងញឹកញាប់បែបនេះ ។
ខ្ញុំមិនដឹងថាថ្ងៃណា ខែណាទេ ទើបខ្ញុំហ៊ាននិយាយរកគេទេ ។ ចាំមើលពីរបីដងទៀតសិន សឹមនិយាយរកគេ ព្រោះហោចណាស់ខ្ញុំក៏មានហេតុផលថា បានជួបគេជាច្រើនដងហើយ គួរតែសុំស្គាល់គ្នារាប់អាន ។ ចុះអ្នកអានគិតថា ហេតុផលបែបនេះល្អទេ? លោគេមិននិយាយរកមនុស្សមិនដែលស្គាល់គ្នាដូចខ្ញុំទៅ? ខ្ញុំខ្លាចផង អៀនផង ហើយក៏ទន្ទឹងរង់ចាំឱកាសល្អដើម្បីឲ្យបានស្គាល់គេផងដែរ ។ ហើយប្រសិនបើគេជាមនុស្សប្រុសស្រលាញ់ប្រុសដូចគ្នាដែរនោះ ខ្ញុំនឹងធ្វើបុណ្យឲ្យបាន ៧វត្តតែម្ដង ។ ខ្ញុំចង់បានគេធ្វើជាសង្សារខ្លាំងណាស់ ប្រុសស្អាតអ្នកសិក្សាអើយ!